Баку, 15 қазан. Қазақстан Президенті Қасым-Жомарт Тоқаев Азиядағы өзара іс-қимыл және сенім шаралары жөніндегі кеңестің (АӨСШК) VII саммитінде жасанды интеллектіні ұйым жұмысының алтыншы бағыты ету туралы ұсыныс жасады. Қазақстан сондай-ақ Әзірбайжанмен бірге өз мұнайын Баку — Тбилиси — Джейхан құбыры арқылы жеткізу көлемін арттырғысы келеді.
Тоқаевтың айтуынша, жасанды интеллект экономикалық дамудың және ұлттық бәсекеге қабілеттіліктің айқындаушы факторына айналды, ал кибершабуылдар қазіргі қақтығыстарда аса жойқын рөл атқарады. Сондықтан сенім шаралары цифрлық саланы да қамтуы тиіс деп санайды Президент.
Қазір АӨСШК-ның бес бағыты бар: әскери-саяси, жаңа сын-қатерлер мен қауіптер, экономикалық, экологиялық және гуманитарлық. Тоқаев оларға жасанды интеллектіге арналған алтыншы бағытты қосуды ұсынды.
Қазақстан Президентінің басқа ұсыныстары:
- алдын алу дипломатиясының тетігін іске қосу;
- Азия елдері су мәселелерін бірге шешуі үшін АӨСШК-ның Су әріптестігін құру;
- АӨСШК-ның көлік өзара байланысы жөніндегі стратегиясын әзірлеу;
- адами капитал саласында әріптестік орнату: Қазақстан АӨСШК-ның барлық 28 мемлекетінің студенттеріне шәкіртақы, ғалымдарына зерттеу гранттарын беруге дайын.
Энергетика туралы айта отырып, Тоқаев Қазақстанның Әзірбайжанмен бірлесіп қазақстандық мұнайды Баку — Тбилиси — Джейхан мұнай құбыры арқылы жеткізу көлемін ұлғайтуды көздеп отырғанын хабарлады.
Сөз бастағанда Қазақстан Президенті Әзірбайжанның АӨСШК-ға төрағалығын жоғары бағалады және саммит күні ұйымға толық құқылы қатысушы ретінде қосылған Лаосты қуана қарсы алатынын айтты.
Баку саммитіне Орталық Азияның барлық президенті келді: Тоқаевтан басқа Шавкат Мирзиёев, Садыр Жапаров, Эмомали Рахмон және Сердар Бердымухамедов.
Анықтама
АӨСШК — Азиядағы қауіпсіздік пен сенімді нығайтуға арналған халықаралық форум. Оны шақыру идеясын Қазақстан 1992 жылы БҰҰ Бас Ассамблеясының 47-сессиясында алға тартты. Қазіргі, жетінші саммит Бакуде өтіп жатыр, Әзірбайжан төрағалық етеді.
