Премьер-министр Олжас Бектенов 15 қазанда катарлық Power International Holding холдингінің басшылары Муатаз және Рамез Аль-Хаятпен газ өңдеу және телекоммуникация салаларындағы бірлескен жобалардың барысын талқылады. Басты назарда – Қашаған кен орнындағы екі газ өңдеу зауытының құрылысы.
Энергетика министрлігінің мәліметінше, Қашағанда қуаты жылына 1 млрд және 2,5 млрд текше метр газ болатын екі газ өңдеу зауытын салу көзделген. Бірінші зауытта құрылыс-монтаж жұмыстары жүргізіліп жатыр, негізгі жабдықты жеткізу іс жүзінде аяқталған. Бірінші зауыт 2027 жылы іске қосылады деп жоспарланған.
Екінші зауыттың мерзімі хабарламаларда әртүрлі: үкімет екінші кезеңнің 2029 жылы аяқталатынын жазса, бірқатар басылым 2030 жылды атайды. Бектенов объектілердің уақытында пайдалануға берілуі үшін бірлескен жұмыстарды жандандыру қажеттігін айтып, үкімет инвесторларға туындаған мәселелерді шешуде жәрдем беретінін растады. Холдинг басшылығы белгіленген кестелерді орындауға дайын екенін растады.
Сондай-ақ Power International Holding құрылысына қатысатын «Бейнеу – Бозой – Шымкент» магистральдық газ құбырының екінші тармағы мен телекоммуникация саласындағы ынтымақтастық талқыланды.
Анықтама
Бірінші газ өңдеу зауыты инвесторларға 1 млрд доллар, екіншісі 2–2,5 млрд доллар тұрады деп 2024 жылы хабарланған.
