Алматы, 15 қазан. Республикалық физика-математика мектебінің (РФМШ) 55 оқушысы 12–15 қазан аралығында жіті ішек инфекциясының белгілерімен Алматының Балалар қалалық клиникалық жұқпалы аурулар ауруханасына жатқызылды. Бұл туралы қалалық қоғамдық денсаулық сақтау басқармасы хабарлады.
Басқарманың мәліметінше, ауруханаға жатқызылған балалардың жағдайы тұрақты, динамикада нашарлаған жоқ; реанимациялық шараларды қажет ететін жағдайлар жоқ. Бұған дейін 48 бала жатқызылғаны туралы хабарланған еді.
Мектептің, интернаттың және ас блогының жұмысы уақытша тоқтатылды, оқушылар қашықтан оқытуға көшірілді. Аурудың себебін анықтап жатыр: зертханалық зерттеуге азық-түлік пен судың сынамасы, беттерден шайындылар алынды, ас блогының қызметкерлері тексеріліп жатыр. Ас блогын тексергенде санитарлық дәрігерлер азық-түлікті сақтау және тамақтандыруды ұйымдастыру жағдайларындағы бұзушылықтарды анықтады.
Жаппай у алу фактісі бойынша Алматы полициясы қылмыстық іс қозғады; жағдайлар санитарлық-эпидемиологиялық қызметтің тексеру нәтижелері ескеріле отырып анықталып жатыр. Білім министрлігі РФМШ басшылығына тамақтандыруды ұйымдастыруды бақылауды күшейтуді тапсырды, мектепте министрлік пен басқа ведомстволар өкілдері кірген арнайы топ жұмыс істеп жатыр.
