Жақын уақытта Президенттік жастар кадр резервіне (ПЖКР) екінші іріктеу басталады, деп хабарлайды VRK News.
Мемлекет басшысы 2021 жылғы 18 мамырда «Қазақстан Республикасы Президентінің 2019 жылғы 27 тамыздағы № 141 «Президенттік жастар кадр резервінің кейбір мәселелері туралы» Жарлығына өзгерістер енгізу туралы» Жарлыққа қол қойды.
ПЖКР-ға екінші іріктеуге жасы 35-ке дейінгі, жоғары білімі және кемінде 5 жыл еңбек өтілі бар жастар қатыса алады. Сондай-ақ жаңа іріктеу аясында үміткерлерде мемлекеттік тілді орташа деңгейден (В1) төмен емес меңгергені туралы сертификаттың болуы талабы енгізілді.
Үміткерлерді іріктеу арнайы ақпараттық жүйе арқылы бірнеше кезеңмен жүргізіледі:
- Құжаттарды қабылдау (онлайн);
- Мәтіндік және сандық ақпаратпен жұмыс істеу қабілетін бағалау (онлайн);
- Жағдаяттық есептерді шешу (онлайн);
- Құзыреттерді бағалау (офлайн);
- Сараптамалық комиссияда үміткерлермен әңгімелесу (онлайн);
- Ұлттық комиссия отырысында қарау (алдын ала онлайн). Үміткерлер резервке 3 жылға қабылданады.
Бүгінгі күні ПЖКР-ның бірінші іріктеуінен мемлекеттік органдар мен квазимемлекеттік компанияларда әртүрлі лауазымдарға 179 резервші тағайындалды.
Осылайша, Президенттік жастар кадр резерві өзінің негізгі міндетін — жас кәсіпқойлар үшін тиімді әлеуметтік лифт құруды іске асырып жатыр.
